Valin verk/

Sameiginlegir aðstoðarmenn fyrir daglega vinnu

Samstarfsfólk mitt notar sameiginlega OpenClaw-uppsetningu til að fá aðstoð við vefi, myndefni og verkefni sem þarf að vinna reglulega. Aðgangurinn er í gegnum app kerfisins og spjallrásir teymisins. Ég nota hana daglega á sýndarþjóni og vinnustöð með öflugu skjákorti.

Það sem nýtist best eru upplýsingarnar sem aðstoðarmennirnir hafa aðgang að. Í handbókinni er útskýrt hvernig kerfin okkar virka. Minni aðstoðarmannanna heldur utan um verkefnin og skjalaleitin finnur vöruupplýsingar. Með því að aðskilja þetta hættu þeir að nota fyrri samtöl sem heimild um vörur.

Í sumum verkefnum þarf AI-aðstoðarmaður að meta næsta skref. Önnur er betra að leysa með föstu, sjálfvirku ferli. Að ákveða hvað á heima hvar, og hver má samþykkja breytingar, hefur skipt meira máli en að bæta við enn einu líkaninu.

Svör úr 5.150 tækniskjölum

Hjá dreifingaraðila iðnaðarefna var mikið af gagnlegum vöruupplýsingum að finna í tækniblöðum, öryggisblöðum og handbókum. Ég smíðaði leitarkerfi sem tekur við spurningum á íslensku eða ensku og vísar á rétta skjalið og blaðsíðuna.

Erfiðast var að finna réttu ensku heimildina út frá ófullkominni íslenskri fyrirspurn. Kerfið leitar bæði eftir upprunalegu spurningunni og þýðingu hennar, ræður við að broddstafi vanti og notar orðasafn sem hægt er að uppfæra til að leiðrétta tækniorð.

Ég valdi líkanið sem skilaði stöðugt nothæfum heimildum frekar en það sem svaraði hraðast. Ég tók líka út aukaþrep sem endurraðaði leitarniðurstöðum (reranker), því prófanir sýndu að það skilaði verri niðurstöðum þegar leitað var á öðru tungumáli en skjölin voru á.

Kerfið hjálpar fólki að finna heimildir og athuga upplýsingarnar sjálft. Góðar niðurstöður úr leitarprófum tryggja ekki að öll svör AI séu rétt.

Ein vinnustöð fyrir leit, myndvinnslu og innri verkfæri

Ég setti upp vinnustöð sem keyrir AI-líkön fyrir skjalaleit, myndir og myndbönd. Á sömu vél keyra líka innri forrit og prófunarumhverfi fyrir vefi.

Helsta áskorunin var að láta verkefnin deila 32 GB minni skjákortsins. Spjall- og leitarlíkön eru tiltæk í daglegri vinnu. Stærri mynd- og myndbandsverkefni bíða í röð og fá skjákortið þegar kemur að þeim. Þannig er fyrirsjáanlegt hvenær þarf að bíða, í stað þess að verkefni stöðvist óvænt vegna minnisleysis.

Vöruupplýsingar eru sóttar með leit í skjölum. Því er hægt að uppfæra skjalasafnið án þess að þjálfa líkanið aftur.

Skapandi frelsi, án þess að teikna vöruna upp á nýtt

Ég setti upp einfalt viðmót fyrir mynd- og myndbandsvinnslu á eigin vél. Fólk getur notað það án þess að setja sjálft upp vinnuferla fyrir AI-líkön. Þar má búa til og breyta myndum, breyta stíl myndbanda og lengja myndskeið.

Vöruljósmyndir fara aðra leið. Myndir frá birgjum eru settar í sama snið og á samræmdan bakgrunn. Þær eru aðeins stækkaðar ef þess þarf. AI-líkön sem búa til myndir eru ekki notuð í því ferli, því þau geta breytt texta á umbúðum eða smáatriðum sem þurfa að vera nákvæm.

Myndvinnslan fer fram á eigin vél og frumgögnin eru geymd þar. Skilaboð til AI-aðstoðarmannsins fara hins vegar í gegnum skýjaþjónustu.

AI-aðstoð við netverslanir, með yfirferð fyrir birtingu

AI-aðstoðarmenn geta unnið með vöruupplýsingar, efni síðna, leitarvélabestun og greiningu í tveimur netverslunum, án þess að hafa ótakmarkaðan aðgang að þeim.

Breytingar á birtum síðum eru vistaðar sem drög sem tengjast upprunalegu síðunni og bíða yfirferðar. Breytingar á vörustraumum (product feeds) þarf líka að samþykkja sérstaklega. Hvor verslun hefur sína tengingu og þjónustan sem getur borið saman gögn úr báðum hefur aðeins lesaðgang.

Ég notaði þau SEO-verkfæri sem fyrir voru þar sem þau dugðu. Sérsmíðin tengir þau við verslanirnar og gerir skilin milli þess að leggja til breytingu og birta hana skýr.

Frá myndasafni yfir í verkfæri fyrir markaðsstarfið

Kerfi fyrir stafrænt efni (DAM) heldur utan um myndefni, herferðir og auglýsingakostnað á einum stað. Þar má fylgjast með kostnaði eftir tímabilum, flokkum og miðlum og sjá bókanir, skilafresti og birtingar í dagatali.

Í kerfinu má skoða mælingar á auglýsingum samhliða sölu og heimsóknum í netverslun. Þannig getur teymið séð hvernig tölurnar þróuðust á meðan herferð stóð yfir og nýtt það við skipulagningu þeirrar næstu.

Þetta gefur yfirsýn yfir efnið, tímaáætlunina, kostnaðinn og árangurinn. Samanburðurinn hjálpar við að meta herferðir en sannar ekki einn og sér hvaða auglýsing leiddi til sölu.

Vörulisti sem fólk ratar um

Fyrir birgi iðnaðarvara er ég að smíða B2B-varahlutavef í WordPress með leit í 3.049 vörum og 468 flokkum. Verkefnið er í þróun, með áherslu á að fólk finni vörurnar og að fyrirtækið geti sjálft haldið efninu við.

Leit sem sniðin er að vefnum hjálpar gestum að rata um vörulistann. Sérsmíðaðar efnisblokkir gera teyminu kleift að uppfæra forsíðuna án þess að brjóta uppbyggingu hennar, í stað þess að þurfa forritara fyrir hverja breytingu.

Í öðru, minna verkefni smíðaði ég vef fyrir bifreiðaverkstæði út frá stuttri verkefnislýsingu og merki fyrirtækisins. Verkstæðið getur sjálft uppfært vefinn.

Umferðaraukning sem var ekki vöxtur

Eftir breytingar á mælingakóða og samþykki fyrir vafrakökum sýndi GA4 mikla aukningu í umferð. Samanburður við Search Console og sölugögn sýndi að mælingin hafði breyst, ekki að gestum hefði fjölgað.

Sá greinarmunur skipti máli áður en nokkur fór að líta á línuritið sem árangur í rekstri. Greiningin nýttist líka við að skipuleggja nýja forsíðu út frá því hvernig fólk leitaði, hvaða tæki það notaði og hvaða vöruflokka það skoðaði.